Exemption sa buhis sa JO gitinguha
CEBU, Philippines - Hangyoon sa kagamhanan sa dakbayan sa Talisay ang Bureau of Internal Revenue (BIR) nga i-exempt sa buhis ang sweldo sa mga job order (JO) nga mga kawani.
Si Konsehal Dennis Basillote nga nahinabi sa Banat News mibutyag nga ubay-ubay sa mga JO ang miduol kaniya ug nangayo og panabang nga dili lang unta kuhaan og buhis ang ilang sweldo.
Sa miaging sweldo ang mga JO sa City Hall sa Talisay nagbagolbol tungod kay gikaltasan og buhis ang ilang sweldo.
Matud ni Basillote nga uban sa mga JO makatrabaho lang sulod sa 15 ka adlaw, dunay usa ka buwan, dunay duha ngadto sa tulo ka buwan apan dunay co-terminus. Ang Talisay duna kini karon kapin sa 1,000 ka JO. Ang matag JO magdawatan og sweldo nga dili moubos sa P200 ngadto sa P300 matag adlaw depende sa ilang trabaho. Gihangyo ni Basillote si City Legal Officer Alfredo Sipalay nga mobuhat og suwat nga maghangyo sa BIR alang sa tax exemption sa mga JO.
Ang maong suwat pirmahan pa ni Mayor Johnny De los Reyes. - /GMR) (BANAT NEWS)
- Latest
