Motor vs trak usa patay

CEBU, Philippines - Patay na nga nahidangat sa tambalanan ang usa ka 64-anyos nga lalaki ug kritikal ang iyang asawa human mabangga ang motor nga ilang gisakyan sa usa ka truck pasado alas 5:00  sa miaging hapon sa Barangay Dawis Sur sa lungsod sa Carmen.

Sumala pa ni PO3 Jerome Quemque, desk officer, nga ang namatay naila nga si Joesito Midado, samtang ang angol naila nga si Helen Midado, 58, nga taga Barangay Lusaran sa dakbayan sa Sugbo.

Base sa imbistigasyon nga gihimo ni PO1 Nerbert Padayao, nga ang mga biktima sakay og motor nga may plate number 5479 XW. Samtang ang suspetsado naila nga si Wilmar Ermac, 28, nga taga ilaha ra usab nga barangay nga nagmaneho sa usa ka dropside Mitsubishi Canter.

Sumala pa ni Quemque  kusog ang dagan sa motor ug misulay kini og overtake sa laing motor nga mi-overtake ‘sab sa usa ka tricycle.

Tungod sa kakusog sa dagan sa motor sa mga biktima ug naigo kini sa walang bahin sa canter nga ilang gikasugat hinungdan nga nalagpot ang magtiayon sa dalan.

Daling gidala sa Cebu Provincial Hospital sa Danao ang mga biktima apan si Joesito gideklarar na nga dead on arrival. - /EIM) (BANAT NEWS)