Gilunopan

CEBU, Philippines - Gianod sa kusog nga baha ang usa ka sakyanan dihang nisuway og tabok sa taytayan nga gisanapan sa tubig duol sa merkado sa lungsod sa Daanbantayan kagahapon sa sayo sa buntag.

Si Bise Mayor Gilbert Arrabis Jr. kinsa usa sa mga nakaresponde miila sa drayber sa Mitsubishi Space Wagon nga si Flaviano Moralde Jr., 60-anyos nga taga Barangay Tominjao.

Nakagawas hinuon si Moralde sa iyang sakyanan apan sa gihapon naanod og 40 ngadto sa 50 ka metros gikan sa taytayan.

Matud ni Arrabis nga nakagunit si Moralde sa sanga sa bakhaw hangtud naluwas siya sa mga tawo dul-an sa duha ka oras.

Si Arrabis, kapolisan ug mga tawo sa lugar ang nagtinabangay nga maluwas si Moralde.

Asoy ni Moralde nga wala’y hunong ang uwan sukad Biyernes sa gabii hinungdan sa pagbaha sa ubang barangay gawas sa Poblacion sama sa Talisay, Tapilon, Agujo, Malingin, Bitoon ug Pajo.

Kining mga lugara gibahaan na atol sa bagyong Frank sa tuig 2008 ug Gorio sa 2013.

Matud ni Daanbantayan Mayor Augusto Corro nga barado sa mga putol nga kahoy ang ilawom sa mga taytayan hinungdang moawas ang baha atol sa kusog nga uwan.

Tinguha karon ni Corro nga matun-an pag-ayo ang pagsulbad sa baha ug iyang palimpyohan ang ilawom sa mga taytayan.

Samtang gibasol ni Corro ang niaging administrasyon sa pag-awas sa baha duol sa merkado sa Poblacion.

Matud ni Corro nga ang reclamation diin gitukod ang merkado maoy hinungdan sa pag-awas sa sapa.

Apan si kanhi mayor ug karon Bokal Sun Shimura misaway sa alegasyon ni Corro sa iyang administrasyon ug sa iyang inahan nga si kanhi mayor Ma. Luisa Loot.

Matud ni Shimura nga gitun-an pag-ayo sa Kapitolyo ang pag-ugmad sa proyekto samtang wala nahitabo ang pagbaha sa lugar atol sa ilang pagdumala sa lungsod.  - /EIM

 (BANAT NEWS)