Duha ka pushers nadakpan
CEBU, Philippines - Nasikop sa kapolisan ang duha ka lalaking gituohang drug pushers sa barangay Lorega-San Miguel ug Sawang Calero, dakbayan sa Sugbo.
Ang search warrant giluwatan ni Regional Trial Court Branch 19 Judge Wilfredo Navarro.
Ang nasikop naila nga sila si Rey Aquino sa Lorega-San Miguel ug Vladimer Sumergido, 26, giingong level 3 drug pusher sa Sawang Calero.
Nakuha sa kwarto ni Aquino ang siyam ka cellphones ug lima ka gagmay’ng pakete, duha ka dagku ug duha ka medium packs nga shabu nga mokabat og P50 mil.
Sumala pa ni Senior Insp. Ryan Acidera Devaras, hepe sa Parian Police Station, nga gipaubos nila sa surveillance ang suspetsado sulod sa duha ka semana.
Gihimakak sa suspetsado nga siya ang tag-iya sa mga drugas nga nakuha apan iyang giangkon ang siyam ka cellphones kay tig-ayo man siya og mga guba ug iya ra usab kining ibaligya.
Si Sumergido nakuhaan usab og daghang drugas nga naglakip sa 21 ka gagmay’ng pakete ug 14 ka medium size sa shabu, usa ka colt .45 pistol nga dunay lima ka bala ug usa ka timbangan.
Matud ni Senior Insp. Chuck Barandog, hepe sa San Nicolas Police Station, nga nakuha sa iyang lawak ang mga drugas og armas.
Sumala pa ni Barandog nga naalarma na ang mga silingan ni Sumergido gumikan sa pagpamaligya niini og ilegal nga drugas duol sa tunghaan.
Mga estudyante ang giingong kustomer sa dinakpan.
Ang duha ka dinakpan gitanggong na ug gikatakdang pasakaan sa tukmang kaso. (/GMR)(BANAT NEWS)
- Latest
