Problema sa City Jail gipadangat sa BJMP

CEBU, Philippines - Giawhag ni Bise Mayor Edgardo Labella ang nasudnong kagamhanan nga pun-an ang budget sa pagkaon, tambal ug uban pang panginahanglan sa mga piniriso sa Cebu City Jail.

Si Labella nga maoy kasamtangang mayor sa dakbayan sa Sugbo misuwat kang Chief Supt. Diony Mamaril, officer-in-charge sa Bureau of Jail Management and Penology (BJMP), diin iyang gisaysay ang gikinahanglan sa Cebu City Jail.

Iyang gibutyag nga ang sakit nga tuberculosis (TB) nikatap na sulod sa selda nga nikalas og duha ka kinabuhi ug 16 kabuok ang nasuta nga nangatakdan sa maong sakit.

Wala’y doktor nga nadestino sulod sa CCJ samtang usa lang ka doktor alang sa tibuok Rehiyon-7.

Ang budget sa matag piniriso alang sa tambal P3 lang nga gihulagway ni Labella nga bisan gani paracetamol di mapalit samtang P50 matag adlaw alang sa pagkaon nga giingong kuwang hinungdan sa pagpangasakit sa mga piniriso.

Nahimong P60 ang budget sa pagkaon matag adlaw dihang gipadangat ni City Jail Warden Johnson Calub ang problema ngadto sa Police Coordinating and Advisory Council nga gipangulohan ni Labella.

Apan usa sa gihatagan og pagtagad sa PCAC ang grabeng kahuot sulod sa selda.

Nanghinaut si Labella nga mahatagan og pagtagad ang iyang gipadangat nga suwat ngadto sa ulohang buhatan sa BJMP. -(/GMR) (BANAT NEWS)