Security agency dunay tulobagon

CEBU, Philippines - Mohimo og imbestigasyon ang Firearms Explosives Security Agency Group Services (FESAGS 7) sa Royal Paratroopers Security Agency nga nagbantay sa Sacred Heart Hospital diin gipusil patay ang usa ka doktor sa iyang pasyente ug ang pasyente naghikog usab.

Matud pa ni Superintendent Marvin Sanchez ang hepe sa FESAGS 7  nga dunay tulobagon ang security agency ug mga gwardiya niini.

Sumala pa ni Sanchez nga base sa ilang record naisyuhan og lisensya sa armas si Wilfredo Sabonsolin niadto lang nakalabay nga tuig apan wa kini permit to carry firearms outside residence (PTCFOR), kini iyang gigamit pagpusil patay kang Dr. Cris Cecil Chan Abbu. Ang Southwestern University mipaabot na sa ilang pahasubo sa pamilya ni Abbu ug miingon nga mokooperar sila sa imbestigasyon.

Si Dr. Abbu usa ka Orthopedic Surgeon giila sa Sacred Heart Hospital sa kontribusyon niini sa maong tambalanan diin nagtudlo usab kini sa College of Medicine ug sa College of Rehabilitative Science sa SWU.

Kagahapon sa hapon usa ka joint conference ang gihimo sa City Intelligence Branch (CIB) ug Homicide Section sa Cebu City Police Office kalabot sa maong insidente.

Gipasabot ni Santander nga posibleng maapil sa ilang imbestigasyon si Renel Tanilon ang helper sa suspek nga maoy nagtulod sa wheelchair ni Wilfredo Sabonsolin. (/EIM)(BANAT NEWS)