Radaza mipiyansa P140 Mil
CEBU, Philippines - Mipiyansa og P140 mil si Lapu-Lapu City Mayor Paz Radaza sa kasong Malversation of Public Funds ug Graft and Corrupt Practices Act sa Sandiganbayan.
Si Radaza miingon nga nakurat siya nga nalambigit sa kasong giingong pagpangawkaw sa pundo sa Girl Scout of the Philippines nga gikalambigitan usab nilang kanhi kongresita Clavel Asas-Martinez, ug ubang opisyal.
Matud ni Radaza nga nakadawat na lang siya og taho nga may resolusyon na ang Sandiganbayan lakip na ang pagpagawas sa warrant of arrest.
Kini ang hinungdan nga daling mipiyansa si Radaza niadtong Hulyo 14 bisan wala pa siya kadawat sa kopya sa warrant of arrest.
Plano sa kampo sa mayor ang pagsang-at og mosyon nga ibalik sa Ombudsman ang iyang kaso sanglit matud pa wala mahatagi si Radaza og higayon nga makadepensa sa iyang kaugalingon. Giangkon ni Radaza nga wala siya kasabot sa iyang gibati ug nasagmuyo sa nahitabo. (BANAT NEWS)
- Latest
