Hepe sa Compostela gihulipan na
CEBU, Philippines- Ang mamahimong epektibo sa mga police functions ug ang mamahimong credible sa mata sa katawhan aron sa paghatag sa saktong serbisyo maoy tumong karon sa bag-ong hepe sa Compostela Police Station nga si Chief Inspector Fructoso Lim.
Nadawat na kagahapon ni Lim ang order gikan kang Cebu Provincial Police Office Director Noel Gillamac.
Gipulihan ni Lim si Senior Inspector Samuel Romanillos kinsa gipailawom karon sa pre-charged evaluation human matud pa gibuhian ang usa ka Ghanian national bugti sa P50,000 human nga nadakpang naghithit og marijuana.
Dugang niya nga tanang lungsod nag-atubang gyud ug problema sa drugas apan magsilbi kining hagit alang kaniya.
Si Lim nahimong hepe sa Medellin Police Station sulod sa sobra sa usa ka tuig human siya gi-assign kaniadtong Marso 18 sa miaging tuig.
“Mas maayo nga focus not only sa supply reduction but also sa demand reduction,” matud ni Gillamac kinsa midugang nga mas maayo kung ang publiko nahibalo sa dautang epekto sa drugas sa tawo.
Sa pagkakaron nagpaabot pa usab si Gillamac kung si kinsa ang napilian ni Medellin Mayor Ricardo Ramirez isip sunod nga hepe sa maong lungsod. - /EIM) (BANAT NEWS)
- Latest
