DFA magbutang og PWD Lanes

CEBU, Philippines- Ang Department of Foreign Affairs (DFA) 7 mogahin og adlaw  sa pagbutang og kaugalingon lane alang sa mga Persons with Disabilities (PWD)  sa paghatag kanila og kasayon niadtong nagtinguha sa pag-process sa ilang passport applications sulod lang sa pipila ka oras nga pagpaabot.

Kini maoy pagpahaom sa pagsaulog dinhi sa nasud sa 36th National Disability Prevention and Rehabilitation week nga matapos sa Hulyo 26 niining tuiga.

Si DFA 7 Director Anika Fernandez sa iyang pamahayag miingon nga parehas ra ang bayran sa mga PWD nga mo-process sa ilang passport applications o renewals sa passports nga P950.

Ang Department of Social Welfare and Development (DSWD) 7 mipahigayon og employer’s forum nga gitumong sa pagdasig sa tag-iya og patigayon sa pag-hire sa mga PWD nga mga empleyado.

Ang presidente sa Mandaue Chamber of Commerce and Industry (MCCI) nga si Philip Tan maoy usa sa mga magpapatigayon dinhi sa Sugbo nga misanong sa maong panawagan sanglit 50 porsiyento sa gidaghanon sa iyang mga kawani mga PWD.

Si Tan namahayag nga ang mga PWD makatabang pa gihapon sa ekonomiya kun sila hatagan og higayon nga manarbaho. - /EIM) (BANAT NEWS)