Niduaw sa kanhi kapuyo, ulo nikagay
CEBU, Philippines- Maayong pagka-kagay sa ulo sa usa ka lalaki human gipusil sa wala mailhing gunman sa dalan Alviola, sitio Ponce 2, Carreta, dakbayan sa Sugbo alas 12 pasado sa nakalabay nga kadlawon.
Patay diha-diha ang biktima nga si Rowen Lobitaña, 31, ulitawo nga nagpuyo sa sitio Monpis, T. Padilla sa maong dakbayan.
Matud ni SPO4 Rey Cuyos, imbestigador sa Homicide Section sa Cebu City Police Office (CCPO), nga nahinabi sa Banat News nga samtang naglakaw si Lobitaña sa maong lugar gikan miduaw sa iyang kanhi kapuyo kalit lang usa ka lalaki ang miduol dayon pusil tumong sa ulo sa biktima. Nakuha sa kapolisan sa crime scene ang duha ka kabhang sa 9mm pistol, duha ka deformed slug ug usa ka bala. Sumala pa ni Cuyos nga posibleng duna’y dakung kasuko ang mihimo sa maong pagpamusil gumikan kay sa ulo gyud gipusil ang biktima ug wala’y plano pa nga buhion.
Dismayado sab ang kapulisan human nga wala’y mihatag og testimoniya sa posibleng nakakita sa krimen.
Nagpadayon pa sa pag-imbestigar ang kapolisan diin ila usab gisubay ang mga record sa biktima kung wala ba kini nakaaway sa nakalabay nga mga adlaw. -/GMR) (BANAT NEWS)
- Latest
