Tulisan namaak
CEBU, Philippines - Gipaslak sa detention cell ang usa ka suspetsado sa pagpanulis kinsa mipaak sa bukton sa hepe sa Fuente Police Station human gi-aresto sa may B. Rodriguez, Sambag 2, dakbayan sa Sugbo sa niaging adlaw.
Ang dinakpan naila nga si Michael Labora, 35, nagpuyo sa maong lugar samtang ang gipaak mao si Chief Insp. Wildemar Tiu.
Usa ka Lyka Fuentes ang nagpakitabang sa ilang buhatan human gitulis sa suspetsado.
Daling girespondehan sa kapolisan ug nasikop si Labora samtang kalma kaayong naglingkod daplin sa karsada.
Dihang dad-on na unta sa presinto, misukol ang suspek hinungdang gipusasan apan wala nakabantay si Tiu ug gipaak sa suspek ang tuong bukton.
Nasuta nga sulod-gawas na ang suspek sa bilanggoan sa managlahing kaso.
Kasong pagpanulis ug direct assault ang ipasaka sa kapolisan batok sa suspek.
Samtang laing duha ka tulisan ang nasikop usab sa kapolisan sa Fuente Police Station ug nakuhaan og .22 revolver nga armas.
Ang mga dinakpan naila nga sila Cleo John Sadaya, 22, taga Guadalupe, dakbayan sa Sugbo ug Jandy Cabahit,32, kanhi security guard nga taga lungsod sa Minglanilla.
Ang biktima naila nga si Kevin Gatoc, 23, taga Punta Princesa, dakbayan sa Sugbo.
Ang biktima samtang naglakaw sa may V. Rama Avenue, pasado alas 10 sa gabii, kalit lang gihunongan sa usa ka motorsiklo dayon deklarar og tulis ug nakuha sa mga tulisan ang iyang cellphone ug kwarta.
Sa follow-up operation, nasikop ang mga suspek ug nakuha ang .22 revolver nga dunay tulo ka bala, duha ka pitaka ug gamay nga pakete sa shabu. (BANAT NEWS)
- Latest
