LTFRB: Way matanggong nga pasahero

CEBU, Philippines - Gikatakda nga usa na gyud ka nationwide transport strike ang himoon sa grupong Pagkakaisa ng mga Samahan ng Tsuper at Opereytor Nationwide (PISTON) nga ipahigayon karong Hulyo 21 adlaw'ng Lunes nunot na sa ilang reklamo batok sa implementasyon sa Joint Administrative Order (JAO) 2014-01.

Ang Land Transportation Franchising and Regulatory Board (LTFRB-7) mibutyag nga kun unsay ilang gihimong pagpangandam sa unang strike nga gihimo sa grupo mao ra usab ang ilang preparasyon sa umaabot nga Lunes.

Ang Transportation Development Officer sa LTFRB-7 Rey Elnar mibutyag nga duna gihapon silay ipakatap nga mga bus nga ilang gihangyo nga mobiyahe gawas sa ilang rota.

Diin 14 ka mga unit sa Ceres bus ang naka-standby nga mobiyahe gikan sa Bulacao paingon na sa Talamban ug laing unom ka unit nga magdagan gikan sa Lapu-Lapu agi sa North Bus Terminal paingon na sa Fuente Osmeña.

Gipasalig sa LTFRB nga walay pasahero nga matanggong sa kadalanan tungod kay walay masakyan, hinuon giawhag niya sila nga tas-an ang pasensiya.

Gipahibalo usab ni Elnar nga dili tanang drivers ug operators ang moapil sa transport strike.

Alang usab niadtong mga drivers nga hulgaon aron lang moapil sa strike,ang LTFRB miingon nga pwede nila kining i-report sa kapulisan aron mahatagan og aksyon.

Nanawagan ang LTFRB niadtong mga operators ug drivers nga moapil sa transport strike nga kun mahimo di na lang mosalmot niini tungod kay sayod  sila nga kalapasan gyud kini sa terms and conditions sa pagkuha nila sa ilang mga prangkisa.    (BANAT NEWS)