Refund sa telcos maayong idonar sa ccmc

CEBU, Philippines - Misugyot si Cebu City Mayor Mike Rama nga imbes iuli sa mga tawo ang sobrang bayad nakolekta sa National Telecommunication Commission (NTC) ug telecommunications companies ihatag na lang kini sa pagpatukod sa Cebu City Medical Center kay mas daghang kabos ang makabenepisyo niini.

Si Cebu City Councilor Nestor Archival Sr., pangulo sa Committee on Energy, Transportation, Communications and Other Utilities sa iyang privilege speech miaging Miyerkules miawhag sa NTC ug telcos  nga ipauli ang 7.6 billion pesos nga sobrang gibayad sa mga subscribers.

Matud ni Archival nga ubos sa RA 7925 o the Public Telecommunications Policy Act of the Philippines pinaagi sa giluwat niining Memorandum Circular 02-10-2011 nga pinetsahan og Oktobre 24, 2011 nga kinahanglan menosan ang bayad sa kada text aron ma-maintain ang tigi sa mga telecommunications company.

Memorandum Circular 02-10-2011 nimando nga ang bayad sa interconnection charge sa Short Messaging Service (text) sa duha ka managlahing network o gitawag nga “off network” kinahanglang di molapas og P 0.15 kada text.

Sa ato pa paus-usan ang interconnection charge og P0.15 gikan sa P0.35 kada text. Makapaubos na unta kini sa bayad og balig P0.80 gikan sa piso kada text.

Apan matud sa SMS Refund Tracker nga gimugna sa Computer Professional’s Union, gibana-bana nga mikita ang mga telcos og bali’g P8 milyones kada adlaw tungod niining naghinobra nila pagpaningil sa mga subscribers. Kini gihulagway ni Archival nga dako kaayong ginansya alang kanila ug dako kaayong alkansi alang sa mga tiggamitan. (BANAT NEWS)