Pamilya sa nakalas nga traffic enforcer tabangan

CEBU, Philippines - Cebu City Mayor Mike Rama misaad nga tabangan sa siyudad ang pamilya sa City Traffic Office Management (CITOM) enforcer nga namatay human nadasmagi miaging adlaw samtang nag-man sa trapiko sa Governor Cuenco Avenue, Banilad Cebu City.

Gihatag ni Rama ang desisyon sa Police Coordinating and Advisory Council (PCAC) kung unsang klase nga assistance ang angay niini ug pila sad ang assistance nga mahatag.

Iyang gidugang nga angay hatagan og assistance ang pamilya niini tungod kay naa sa trabaho si Maria Theresa Bascones samtang nahitabo ang insidente.

Gimandoan usab ni Rama ang CITOM nga ipadali ang sidewalk availability ug dugang lanes aron hingpit nga mahunong ang left turn sa maong lugar.

Kung gusto usab sa mga tag-iya sa tindahan nga magbutang gyud og left turn anang dapita kinahanglan sila mobutang og enforcer nga maoy motabang sa mga traffic enforcer nga gidestino sa CITOM dihang dapita. Kay ang gusto ni Rama nga ipatangtang gayud ang left turn dihang dapita.

Sa wala pa milarga padung gawas sa nasud si Rama alang sa iyang official trip gimandoan niya si Bise Mayor Edgardo Labella nga pahibaw-on siya kanunay sa kalamboan sa Ban-Tal area. Kinahanglan paluyohan ang mga transaksyon sa South Road Properties (SRP). Ug ikatulo mao ang pag-andam sa annual budget ug kinahanglan barangay based kini. (BANAT NEWS)