Napulo ka brgy sa Mandaue peligro sa baha

CEBU, Philippines - Napulo ka mga barangay sa dakbayan sa Mandaue ang gitumbok sa Department of Environment and Natural Resources (DENR) 7 nga peligro sa pagbaha panahon nga kusog ang pagbunok sa ulan.

Si Eddie  Llamedo ang tigpamaba sa DENR-7 nga nahinabi sa Banat News miingon nga ang flood prone barangays mao ang Subangdaku,  Tipolo,   Mantuyong, Looc,  Opao,  Maguikay, Umapad, Basak,Paknaan ug Banilad. Matud pa niya nga  kinahanglang bantayan gyud og maayo ang maong mga barangay panahon nga ting-uwan aron daling mahiklin sa mas luwas nga lugar ang mga molupyo.

Si Umapad Barangay Kapitan Nelson Rubio nga nahinabi sa Banat News miingon nga gihimo na sa kagamhanan sa dakbayan ang pagbahig ngadto sa nagkadaiyang cluster nga maoy motubag sa panahon sa katalagman nga naglakip na ang pagbaha ug pagdahili sa yuta. Si Llamedo miingon nga  dinhi sa lalawigan ilang gihangop ang pag-umol sa mga Barangay Disaster Risk Reduction and Management Council (BDRRMC) sanglit  mao man kini ang dali ug unang makaresponde. (BANAT NEWS)