Sakyanan ipang-clamp

CEBU, Philippines - Ang mga PUJ drivers nga motambong sa public hearing sa Cebu City Council karong buntag gipasidan-an nga dili magpataka og parking sa ilang sakyanan sa palibot sa City Hall aron dili kini i-clamp.

Mao kini ang pasidaan ni Konsehal Dave Tumulak kinsa mibutyag nga ang kagamhanan sa dakbayan sa Sugbo mopabiyahe sa mga Kaoshioung buses kun makita nga monihit ang mga sakyanan.

Si Mayor Michael Rama miawhag sa mga drayber nga magpadala lang sila og representante nga motambong sa public hearing kay dili man ‘sab sila katugotan nga pasudlon paghurot sa limitado nga gidak-on sa session hall.

Ang mga konsehal mohimo’g public hearing karong adlawa aron ang mga drayber makapadayag sa ilang sentimento sa wala nila paghiuyon sa Joint Administrative Order 2014-01 nga nagpahamtang og dagko nga multa sa madakpang drayber.

Giimbitar nga motambong sa public hearing ang kadagkoan sa LTO ug LTFRB.

LTO dili pa mo-deputize sa PNP

Ang Land Transportation Office (LTO) wala pa g’yuy plano nga i-deputize nila pagbalik ang kapolisan ug mga traffic enforcers tungod sa daghang reklamo nga ilang nadawat.

Ang mga drayber og public utility vehicles (PUV) mireklamo ngadto ni LTO-7 Acting Regional Director Arnel Tancinco nga daghan nga polis ug traffic enforcers nga gi-deputize kaniadto sa LTO kusog kaayo nga mangilkil sa mga motorista.

Kini maoy rason sa kadagkoan sa LTO nga dili pa sila mo-deputize sa mga polis ug traffic enforcers aron nga mabalik ang pag-respeto sa mga drayber sa mga road law enforcers.

Pagka karon, ang mga organic personnel ra sa LTO nga gidistino sa operations branch maoy gitahasan nga manakop sa mga masalaypong drayber.

Si Tancinco miingon nga ang kamandoan gikan sa Department of Transportation and Communications mao nga kadto ra’ng mga kawani sa lainlaing ahensya sa kagamhanan nga ubos sa DOTC ang mahimo nga i-deputize sa LTO.

Ang ubang ahensya nga ubos sa DOTC naglakip sa Land Transportation Franchising and Regulatory Board (LTFRB), Coast Guard, National Telecommunications Commission, Bureau of Telecommunications (Butel) ug uban pa.

Gipasabut ni Tancinco nga dali na lang unya ang pagtangtang sa mga kawani sa LTO-7 sa higayon nga makahimo sila og bug-at nga kasaypanan.

Si Tancinco nagkanayon nga ang gihingusgan karon pagpanakop sa LTO mao ang mga kolurom nga mga bus, taxi ug ingon man ang ubang sakyanan mao nga nakigtambayayong sila sa LTFRB.

Ubos sa Joint Administrative Order 2014-01 dagko na kaayo ang multa sa mga madakpan nga drayber. - /RUB) (BANAT NEWS)