Transport strike: DepEd mag-agad sa mga mayor kun may klase
CEBU, Philippines- Ang mga mayor sa nagkadaiyang lugar sa Central Visayas maoy agdon sa Department of Education pagdeklarar kun naa o walay klase sa ilang mga lugar kun mahinayon gayod ang gikatakda nga transport strike karong Hulyo 21 ug 22 o Lunes sa sunod semana.
Kini maoy nasayran sa Banat News kang Carmelita Dulangon, Department of Education (DepEd) 7 regional director nga nahinabi kagahapon.
Matud pa niya nga mag-agad unya sila sa hukom sa mayor sa kulungsoran o mga dakbayan dinhi sa rehiyon una pa sila modeklarar.
Si Dulangon nagkanayon nga labing maayo nga gipahibalo sa transport groups ang ilang strike tungod kay makapangandam usab ang ilang buhatan ug mga lokal nga kagamhanan sa lugar nga maapektohan.
Si Land Transportation Franchising and Regulatory Board (LTFRB) 7 Regional Director Ahmed Cuizon nga nahinabi sa Banat News miingon nga dakong kalapasan sa ilang (transport groups) prangkisa ang strike.
Gipasabot ni Cuizon nga igo na kaayo ang pagdangop sa korte labot sa ilang pagsupak sa Joint Administrative Order 2014-01.
Ang JAO-2014-01 nagpahamtang og dakong balayranan sa mga drayber ug operators nga makalapas sa lagda sa trapiko.
Si Romeo Armamento nga maoy bise presidente sa Visayas sa National Confederation Transport Workers Union –Alliance of Progressive Labor miingon nga di makiangayon ang maong bag-ong lagda.
“Unsa man ni, matuwid pa ni nga daan o naglikoliko na nga daan?” nagkanayon si Armamento sa iyang pamahayag. - /EIM) (BANAT NEWS)
- Latest
