No Segregation No Collection sa Toledo City gihingusgan

CEBU, Philippines- Gihingusgan sa kagamhanan sa dakbayan sa Toledo  ang “No Segregation No Collection” policy sa pagpangolekta sa basura. Subay niini giawhag sa hepe sa Public Services Division (PSD), Rex Ybañez, ang kabarangayan nga mosuporta sa ilang tinguha alang sa kalimpiyo sa dakbayan pinaagi sa pagsunod sa lagda sa paglabay sa basura.

Nangayo usab sa pagsabot si Ybañez sanglit nagkuwang ang iyang sakop ingon man ang mga garbage truck nga magamit sa paglibot sa kabarangayan. Nibahad si Ybañez nga silotan gyud ang dili motuman sa lagda sa paglain sa basura nga dili malata ug malata.

Nasayran nga adunay multa nga dili moubos sa P1,000 ug mabilanggo ang makalapas niini.

Gihangyo usab ni Ybañez nga dili ipataka og bilin ang mga basura sa mga residente kun wala pa ang mangolekta sa basura aron dili tangagon sa iro o kuykuyon sa mga basurero ug dili magkatag sa kadalanan.  - /GMR) (BANAT NEWS)