Maternity hospital nakalapas sa RA 10028

CEBU, Philippines - Ang inter-agency task force nga miimbestigar sa pagtaptap sa baba sa bata sa Cebu Puericulture Center and Maternity House Inc. mirekomendar sa Secretary of Health nga silotan ang maong ospital sa wa pagsunod sa breastfeeding policy.

Ang mga rekomendsyon sa maong komitiba gipadala sa opisina ni Bise Mayor Edgardo Labella niadtong Hunyo 27 ning tuiga.

Base sa balaod, ang tanang mga tambalanan sa nasud kinahanglang motuman sa RA 10028 kon Expanded Breastfeeding Promotion Act of 2009.

Matud sa suwat nga gipadala ni Department of Health (DOH)-7 Regional Director Jaime Bernadas ngadto sa Sanggunian Panlungsod, iyang gipadala ang resulta sa imbestigasyon sa komitiba tungod gitahasan sila nga mohatag og kopya sa konseho.

Lakip sa mga rekomendasyon sa komitiba nga mo-isyu ang Secretary of Health nga kinahanglang mosumitir og Certificate of Commitment (Mother Baby Friendly Hospital Initiative Certification) ang ospital isip requirement sa pagkuha og License to Operate.

Karong Oktubre  ang pag-renew sa maong lisensya ug kun dili makapasar ang maong ospital dili na kini makapadayon sa ilang operasyon.

Kahinumduman nga niadtong Mayo 9, gisaway og maayo ang tambalanan human gi-post sa inahan ang litrato sa iyang anak nga dunay plaster sa baba samtang diha pa kini sa sulod sa nursery room.

Ang kadagkoan sa maong tambalanan kusganong mihimakak sa mga pasangil nga gialegar sa managkapuyo nga Noval ug Badocdoc. Ilaha usab gihimakak nga gitugot nila ang paggamit og pacifiers.

Ang amahan nga si Ryan Noval ug inahan nga si Jasmine Badocdoc mihulga og pasaka og kaso batok sa ospital. Sa regular session niadtong Hulyo 9, gi-refer ang maong resulta sa Committee on Health aron estudyuhan.  (BANAT NEWS)