7-anyos nalatayan sa trak

CEBU, Philippines - Patay ang usa ka 7-anyos nga batang lalaki samtang ang uyoan niini kritikal ang kondisyon human sila nalatayan sa usa ka Isuzu forward truck niadtong Biyernes sa hapon diha sa Barangay Lawaan I, dakbayan sa Talisay.

Ang nahisgutang bata mao si Alison Castañares kinsa angkas sa motorsiklo nga gimaneho sa iyang uyoan nga si Gerson Castañares, 29, parehong taga Sitio Pajo, Barangay Lawaan I, dakbayan sa Talisay.

Si PO3 Henry Diano sa Talisay City Traffic Division mibutyag sa Banat News nga base sa imbestigasyon nila ni SPO1 Isaias Cabuenas ug SPO1 Cecelio Miñoza gikan sa dakbayan sa Sugbo paingon sa habagatan ang mga biktima.

Ang maong motorsiklo diha kini magsubay sa “fast lane” sa karsada ug giingong aksidenteng miigo sa walang bahin sa Mitsubishi Canter, double cargo truck nga dunay temporaryong plaka nga #038604 ug gimaneho ni Condrado Calderon, 39, taga Barangay Libo, lungsod sa Sibonga.  Ang maong truck nagbiyahe kini sa samang direksiyon sa motorsiklo.

Human maigo ngadto sa nahisgutang trak wala na niini makontrol ang manobela sa motorsiklo ug mitabok sila ngadto sa pikas lane.

Apan mao say paglabay sa kasugat nga usa ka Isuzu forward truck nga nagtangag sa plakang GTL- 265 nga gimaneho ni Guillermo Nipaya, Jr., 23-anyos taga Barangay Prinsa, lungsod sa Balamban.

Ang mga biktima daling gidala ngadto sa Talisay City District Hospital apan ang bata wala na kini makaabot nga buhi diha sa maong tambalanan samtang ang uyoan niini gibalhin ngadto sa South General Hospital sa dakbayan sa Naga.  (BANAT NEWS)