Tinun-an nahagbong

CEBU, Philippines - Nakaangkon og kadaot sa tuong bahin sa iyang ulo ug bukton ang usa ka estudyante sa grade 8 sa Talisay City National High School human kini matagak gikan sa ikaduha’ng andana sa tunghaan kagahapon sa buntag.

Ang biktima nga si Christian Bautista, 15, taga Barangay Biasong, Talisay dali nga gidala sa Vicente Sotto Memorial Medical Center (VSMMC) tungod sa kabalaka sa iyang kahimtang.

Si Virgilio Bustillo, usa sa mga miresponde sa maong hitabo, miingon nga nahulog ang bata human sa klase sa Physical Education (PE). Adunay report nga ang biktima ug ang iyang mga kaklase nagtukmod-tukmod diha sa second floor sa school building nga dili kaayo taas ang barandilyas.

Matud sa mga saksi nga ang bata una kini nga nabanda ngadto sa punoan sa kahoy kilid sa building una pa mitugpa sa yuta.

Ang grupo ni Bautista human sa ilang klase giingong gibadlong kini nga dili magpundo diha sa may hagdanan. Gituohan nga ang biktima milingkod kini sa “concrete barrier” hinungdang nahulog tungod kay matud pa imposible nga nahulog kini kun nagtukmod-tukmod lang ug ang iyang mga higala.  Si Rosner Bullozos, ang guidance counselor sa tunghaan miingon nga maghimo pa sila og dugang imbestigasyon sa hitabo. (BANAT NEWS)