Dakong kahoy’ng acacia natumba

CEBU, Philippines - Nabalda ang dagan sa mga sakyanan human natumba ang dako ug karaan nga punoan sa Acacia nga mibabag sa karsada sa Barangay Balud, San Fernando.

Naangol ang drayber sa hauler truck nga aduna’y plate number nga WQV-742 ug nakaangkon og mga samad ug ang pahinante nga naigo sa ulo diha nga natumbahan ang sakyanan samtang nagdagan paingon sa habagatan.

Ang duha gidali pagdala sa labing duol nga tambalanan. Matud sa inisyal nga imbestigasyon sa mga polis sa San Fernando ang punoan sa Acacia karaan na kaayo nga miresulta sa pagkatumba.

Matud pa nga ang mga residente sa maong lugar dugay na mireklamo bahin sa punoan sa acacia nga basin makamugna og disgrasya apan wala kini aksyoni sa mga opisyal. Naswertean nga niadtong orasa atol sa pagkatumba nga mingaw ug walay nangagi nga sakyanan. - /RUB (BANAT NEWS)