Seniors nakadawat tag P1,500
CEBU, Philippines- Gipanghatag na kagahapon ang tag P1,500 nga insentibo sa dos mil kapin ka mga senior citizens sa dakbayan sa Mandaue samtang dugang samang kantidad ang madawat unya sa Disyembre.
Si Mayor Jonas Cortes ang nangulo sa pagpanghatag nga gipahigayun sa Mandaue City Sports and Cultural Complex diin ang barangay Mantuyong, Centro, Guizo ug Cambaro ang unang nakadawat sa 27 ka barangay.
Matud ni Cortes nga gihimo na nilang P3,000 ang madawat sa mga senior citizens karong tuiga gikan sa P2,000 sa nangaging katuigan.
Ang presidente sa kahugpongan sa mga senior citizens sa dakbayan nga si Perfecto Perilla nipadayag sa kahinangop sa maong kantidad nga ilang nadawat.
Nisaksi sa kalihukan sila si Konsehal Demetrio Cortes Jr. nga maoy chairman sa committee on senior citizen sa konseho ug iyang mga sakop nga sila si Konsehal Dollores Emmarie “Lollipop” Ouano-Dizon, Elstone Dabon, Benjamin Basiga ug Nenita Layese.
Si Konsehal Cortes miingon nga iyang paningkamutan nga kapasiugdahan sa kabarangayan ang medical mission ug hangyoon ang Department of Health ug kagamhanan sa lalawigan sa Sugbo alang sa paghatag og libreng tambal ug ipasakop sa PhilHealth program ang katiguwangan. - /GMR(BANAT NEWS)
- Latest
