Gi-hostage ang pamilya

CEBU, Philippines - Human sa dul-an 12-oras nga pag-hostage sa iyang pamilya, nakombinsir sa kapolisan pinaagi sa negosasyon ang usa ka kanhi Overseas Filipino Worker nga motahan sa iyang kaugalingon ug gibuhian ang gi-hostage niyang asawa ug duha ka anak sud mismo sa ilang panimalay sa Sitio Sindulan, Barangay Tina-an, Dakbayan sa Naga kagahapon.

Ang suspek giila nga si Veroni Bacon, 48, samtang ang iyang asawa mao si Lendela Bacon ug ilang usa pa ka tuig nga anak ug 22-anyos nga anak nga babaye gikan sa alas-6 sa buntag ug gibuhian sila  diyes minutos sa dili pa ang alas-6 sa hapon.

Sumala pa nga armado si Bacon og .357 revolver  ug kutsilyo nga maoy gigamit niya pag-hostage sa iyang mga anak.

Samtang si Superintendent Brindo Nacario, hepe sa Naga Police Station mibutyag nga maximum tolerance gyud ang ilang gipatuman aron way makalas nga kinabuhi.

Matud niya naglisod gyud sila sa pag-penetrate  tungod kay pirmeng nakatutok ang armas sa suspek ngadto sa iyang asawa.  Sumala pa ni Nacario nga gibalik-balik gyud og sulti sa suspek ngadto kanila nga nagduda siya nga dunay karelasyon nga lain ang iyang asawa. Ang apohan sa suspek nga si Conchita Bacon  mikompirmar nga nangabubho ang apo.

 Matud pa ni Conchita tiggamitan og ginadiling drugas ang apo.

Si Bacon kanhi industrial electrician sa Canada apan wala na kini kabalik og larga human nasakit og heart enlargement ug tubig sa baga nga naka-depressed kaniya  maong  nagbisyo og ilegal nga drugas.  Apan ang kinamaguwangang anak sa suspek nga si Devi Bacon mibutyag nga bisan og didto pa sa laing nasud ang iyang amahan giingong nalambigit na kini sa ilegal nga drugas .

Samtang si PO2 Gilmer Noval sa Naga Police Station kinsa maoy nahimong negosyador mibutyag nga nangayo og pagkaon ang suspek ug gipasaligan nila kini nga kun i-surrender niya ang armas walay dautang mahitabo kaniya ug ingon man sa pamilya niini.

Diha usab sa negosasyon si Naga City Mayor Valdemar Chiong nga misuway usab og tabang  pakig-estorya sa suspek.  (BANAT NEWS)