Drug pushers sa Tanke ginagmay ra — Cabanes

CEBU, Philippines - Ang kapitan sa Barangay Tanke, dakbayan sa Talisay Perla Cabanes miawhag sa kapolisan nga kanunayon ang pagbutang og police checkpoints sa iyang barangay, wala siya molimod nga duna g’yuy operasyon sa ilegal nga drugas diha sa iyang barangay.

Matud ni Cabanes nga sobra sa 10 ka tawo ang nag-operate diha sa ilang lugar apan mga ginagmay lang kini, nagdumili hinuon siya pagbutyag sa ilang mga pangalan.

Usa sa mga opisyal sa barangay mibutyag sa mga tigbalita kagahapon nga dunay polis kaniadto nga ilang gitug-anan sa mga pangalan ug sketch diin nag-operate ang mga drug pushers apan ila na lang nahibaw-an nga gipangayoan ra kini og protection money sa maong polis kinsa nagdumili siya sa paghingalan. Kaniadto pa nagsige og hangyo si Cabanes nga pabutanga’g polis ang iyang barangay apan dili permanente.

Si Cabanes nagkanayon nga kasagarang mosulod diha sa ilang lugar aron mogamit og ginadiling drugas dili taga Tanke ug kung dunay mag-checkpoint magpanagana na og sulod diha sa lugar.

Matud niya nga  namatud-an kaniadto nga epektibo kaayo ang kanunay nga pagbutang og checkpoint, apan nahibulong siya nga nahunong na kini.

Si Superintendent Reycel Carmelo Dayon, hepe sa kapolisan sa Talisay misanong sa hangyo ni Cabanes apan kinahanglang moabag ang barangay officials sa kampanya batok sa illegal drugs. (/EIM)(BANAT NEWS)