Pagbalhin sa istatuwa ni Lapu-Lapu padayonon
CEBU, Philippines - Padayonon ni Lapu-Lapu City Mayor Paz Radaza ang tinguhang pagbalhin sa monumento ni Lapu-Lapu sa siyudad gikan sa Luneta Park sa Manila bisan sa pagsaway nga iyang naangkon.
Matud ni Radaza nga dili niya tubagon ang mga pagsaway diha sa social media sanglit iyang gitahud ang opinyon sa uban.
Tumong sa plano mao ang pagpangandam sa ika-500 nga kasaulogan sa kadaugan sa Mactan karong tuig 2021.
Kung madayon ang pagkuha sa rebolto, adto kini ibutang sa Barangay Punta Engaño diin aduna’y duha ka ektarya ang ipa-reclaim ug itupad si Lapu-Lapu sa iyang amahan nga si Datu Mangal.
Sayo niini si Kong. Raul del Mar sa dakbayan sa Sugbo nipadayag sa iyang pagsupak tungod sa kabalaka nga basin unya og dili matagad ang monumento.
Apan gipasalig ni Radaza ang pag-atiman niini sanglit usa man ka first class city ang Lapu-Lapu.
Gipasalig usab sa mayor nga dili makagasto ang siyudad sa pagbiyahe unya sa monumento ni Lapu-Lapu sanglit dunay pondo nga gitagana ang nasudnong kagamhanan.
Kahinumduman nga si del Mar usa sa miawhag sa Office of the President nga tugutang ibutang ang istatuwa ni Lapu-Lapu sa Rizal Park. Ang P15 milyones nga bronse nga istatuwa ni Lapu-Lapu gidonar sa Korean Freedom League. (BANAT NEWS)
- Latest
