Senador Santiago may stage 4 lung cancer

CEBU, Philippines - Gianunsyo kagahapon ni Senador Miriam Santiago nga duna siya’y stage 4 cancer sa baga. Ang senadora nga naila na kaayo sa iyang pagkamaisugon nga sakop sa senado ug ingon man siawon sa gawas ug way bisyo.

"I have come so you can [see] me personally before cancer ravages my body," matud pang Santiago,  gani ang uban sa iyang pahibalo gipaagi pa niya sa iyang tweet sa iyang  personal account @SenMiriam.

Apan bisan pa man sa iyang kahimtang, way timailhan nga dunay ingon niini nga matang nga sakit ang senadora ug milabay pa og pasiaw sa iyang mga kaubanang magbabalaod.

Gipahibalo usab ni Santiago  nga bisan Stage 4 na ang iyang lung cancer wala gyud kini mokatap sa ubang bahin sa iyang lawas ug mipasiaw na usab sa pag-ingon nga bisan ang kagaw dunay kahadlok kaniya.

“In my case, they are very very well-behaved. I’ve been disciplined all my life so even my cancer cells are showing excellent discipline.”

Matud pa niya mopaubos siya og unom ka semana nga treatment ug malaumon siya nga maayo ra siya human niini. Giangkon hinuon niyang dunay panahon nga maglisod siya og ginhawa.

Midugang siya nga dili siya moinom og bino o alcohol ug labaw na nga dili siya hinabako tungod sa disiplina niya sa iyang kaugalingon.

"I don’t know what the reactions of my enemies are. Maybe they’ll be happy because on one hand I might die and then they could get rid of me but on the other hand, I might survive and I will get rid of them," dugang pa niya. Dihang gipangutana kung unsa kaha maoy hinungdan nga nataptan siya sa maong sakit mipasiaw na usab kini sa pag-ingon nga posibleng ang hinungdan niini mao ang pagsige niya og hatag og labad sa ulo sa iyang mga kaubanan sa Senado.

Kahinumdoman nga si Santiago mi-resign sa iyang pagkahukom sa International Criminal Court tungod sa iyang panglawas.

Si Santiago usa sa gihugon-hugonan nga mokandidato sa 2016 presidential elections. (Gikan sa Wires/EIM)  (BANAT NEWS)