Mga reklamante vs “kontraktor” nagabot-abot
CEBU, Philippines - Nagpaila nga contractor nga na-entrap sa Theft and Robbery Section sa Cebu City Police Office (CCPO) ug dugang tulo ka reklamante ang mitumaw human nakabasa sa balita sa Banat News.
Usa ka tag-iya og fitness gym nga naila nga si Jun Tabay nga taga Zulueta, Pari-an, Cebu City mipasangil kang Resma nga mikuha sa iyang TV sa iyang gym kay gipasaligan siya niini nga ilisan og flat screen. Mialegar usab si Tabay nga nakahatag siya og P10 mil sa suspetsado.
Sa pag-atubang sa duha, diriyot dumoga ni Tabay si Resma tungod sa iyang kapungot ug gihagit na lang kini og sumbagay.
Laing reklamante batok ni Resma mao ang usa ka pastor nga giila nga si Noel Centino, nga mireklamo nga miisyu kaniya og “bouncing check” nga nagkantidad og P550 mil bugti sa iyang sakyanan nga Starex van.
Apan sumala pa nga sa dihang iya unta pabayloan ang maong tseke nakurat na lang kini nga wala diay kini sulod ug sa iyang pagsuna sa suspek giingnan siya niini nga gibaligya na niya sa ubang tawo ang van.
Usa usab ka Princesita Recto nga taga Lagtang, Talisay City, ang mitudlo sa dinakpan nga miikyas sa bayrunon kaniya nga P60 mil sa abang sa iyang panimalay, midugang siya nga gibayran usab siya niini og tseke nga way pundo.
Matud pa ni Chief Inspector Noli Cernio ang hepe sa TRS sa CCPO nga human nakabasa sa Banat News ang mga nabiktima ni Resma nagabot-abot ang mga reklamante sa ilang buhatan.
Gipaabot pa sa kapulisan ang dugang reklamante nga moabot sa ilang buhatan. (/)(BANAT NEWS)
- Latest
