Babayeng di gusto makig-balik giluba sa kapuyo

CEBU, Philippines - Usa ka babaye ang naangol human giluba sa iyang kanhi ka live-in partner kay dili na kini gustong makigbalik pa niadtong milabay’ng gabii diha sa Barangay San Nicolas, ning dakbayan sa Sugbo.

Ang biktima nga si Merly Serotso, 36, gidala sa Cebu City Medical Center (CCMC) tungod sa mga samad dinunggaban sa iyang tiyan, dughan ug bukton.

Padayon karong gipangita ang kanhi kapuyo niini nga si Porferio Indab, 40, usa ka traysikad drayber nga daling miikyas palayo sa dapit.

Matud pa ni PO1 Michael Angelo Singson sa Homicide Section sa Cebu City Police Office (CCPO) dugay nang nagbulag ang duha tungod kay kusog manapat ang suspek.

Ang biktima gisugo sa iyang agalon sa gawas apan nag-atang na didto ang suspek ug mihangyo nga buot niining makigbalik kay gimingaw na kini kaniya.

Apan nagdumili ang biktima ug giingnan kini nga gikapoy na siya sa iyang kinabuhi uban sa suspek hinungdan sa kasuko sa naulahi ug diretsong midunggab sa biktima. Kasong attempted murder ang atubangon sa suspetsado. (BANAT NEWS)