Daghan gihapon ang badlongon

CEBU, Philippines - Nabantayan nga bisan og gipatas-an na ang kantidad sa multahan niadto’ng mga drayber nga madakpan sa kalapasan sa balaod sa trapiko apan daghan pa nga motorista, sagad mga drayber og public utility vehicles, nga nagpabadlong.

Mga traffic enforcers mitug-an sa Banat Manobela nga wala sila’y nakita nga kausaban sa batasan sa mga drayber bisan og gipatas-an na ang multa pinaagi sa Joint Administrative Order 2014-01.

Ang mga traffic enforcers hinuon wala pa’y nahimo batok sa mao nga mga drayber nga nakahimo og kalapasan sa lagda base sa Republic Act 4136 kay wala pa sila pang-isyuhi pagbalik og Temporary Operator’s Permit (TOP).

Ubos sa bag-ong lagda, bisan kadto’ng mga drayber nga masakpan nga magmaneho’g sakyanan nga dili magtaud og seat belt mamultahan na sila og P3 mil nga kaniadto ang multa P300 lang.

Ang drayber nga si Stephen Doria nga nagmaneho og PUJ nga nagbiyahean sa rota nga 09F (Basak-Colon) gisakmitan sa iyang lisensya sa LTO ug pamultahon og P5 mil human mamatud-i nga mihimo og trip-cutting pinaagi sa wala paghatud sa iyang mga pasahero sa ilang destinasyon.

Inay nga mosubay pa si Doria sa dalan Colon gikan sa dalan Junquera nga maoy gilatid sa iyang rota, si Doria miliko ra sa Sanciangko ug gipakanaog ang iyang mga pasahero. Kun kaniadto P1,500 lang ang multa sa “refusal to convey” karon gihimo na nga P5 mil. (BANAT NEWS)