Nutrition Month sa Mandaue gilusad

CEBU, Philippines - Gilusad sa kagamhanan sa dakbayan sa Mandaue niadtong Domingo ang indigay sa backyard gardening ug Agro-Fair  isip kabahin sa mga nag-unang kalihukan sa Nutrition Month sa buwan sa Hulyo.

Ang programa gipasiugdahan sa Mandaue City Nutrition Council ug giabagan sa City Agriculture’s Office ug giapilan usab sa nagkadaiyang barangay sa dakbayan.

Ang mga hardener gikan sa barangay Pagsabungan, Paknaan, Casili ug Cambaro maoy nag-una sa pagtambong.

Si Bise Mayor Glenn Bercede maoy nangulo sa pagtambong sa kalihukan kinsa mao usab ang nagbasa sa mensahe nga gipadangat ni Mayor Jonas Cortes nga wala makatambong.

Naglakip sa kategoriya sa indigay nga pagahimoon mao ang individual container gardening ug lakip na usab ang barangay nga mao ang labing daghan nga gardeners. Ang  mga mananaug sa maong indigay makadawat og P20 mil nga ganti alang sa unang mananaug, P15 mil alang sa ikaduha ug P10 mil alang sa ikatulo ug P2 mil usab ang madawat sa mga mosalmot nga dili makadaug.

Ang dakbayan sa Mandaue nga giilang Industrial City sa Sugbo aktibo nga nagpatuman sa solid waste management ug backyard gardening program sa kagamhanan. (BANAT NEWS)