French biktima sa ‘himarat girls’

CEBU, Philippines - Nasikop sa Carbon Police Station ang duha ka “himarat girls” human gireklamo sa usa ka French nga mikuha sa iyang kuwarta.

Nagpakitabang sa Carbon Police Station pasado alas 7 sa buntag niadtong Sabado si Ahmed Abdillahi Waberi, 19, nagtungha sa kursong medicine sa Sugbo, human siya gikawatan sa duha ka babaye nga iyang gidala sulod sa usa ka pension house sa may dalan Colon. Ang mga suspek nailhan nga sila si Chisty Luis, 34, ug Naomi Demalante, 22, taga Bato Carbon, dakbayan sa Sugbo. Matud ni PO2 Mario Nator sa Carbon Police Station nga buntag na nga nabantayan sa langyaw nga nawala na ang iyang 100 dolyares ug gidudahan gikuha sa duha ka babaye dihang siya nakatulog ug gibiyaan sulod sa kuwarto.

Sa gihimong follow-up sa kapolisan, nasikop ang duha ka babaye apan katunga nalang sa kuwarta ang nauli ngadto sa langyaw.

Sumala ni Nator nga gitawag og “himarat girls” ang maong mga babaye ug modus ang pagpangawat sa ilang makauban nga kostumer ilabina og langyaw.

Wala’y plano ang langyaw nga pasaylo-on ang duha ka babaye sa iyang kalagot ug gikatakdang pasakaan og kaso sa pagpangawat.   (BANAT NEWS)