Mayor sa Argao nananom og kahoy bisan may kaso ang DENR kaniya
CEBU, Philippines - Taliwala sa kontrobersiya nga nagpalibot sa lungsod sa Argao, gipahigayon kagahapon ang ilang Run2Plant activity didto mismo sa maong bukid nga maoy sentro sa kaso nga giatubang sa ilang mayor.
Miabot sa dos mil ka tawo ang mitambong sa fun run nga gitapos sa usa ka tree planting pasaka sa bukid sa Argao ug nahurot pagtisok ang 10,000 ka mga seedlings sa tugas, aguho, guyabano, nangka, ug mangga, matud ni Mayor Edsel Galeos.
Pasabot ni Mayor Edsel Galeos, limpyo ang ilang tumong sa pagsuporta sa reforestation program sa national government mao nga ilang gipadayon ang tree planting sa Mt. Binalabag bisan pa man og mitambag ang Department of Environment and Natural Resources nga mas maayo nga mag-mangrove planting sila.
"Actually, wala’y balaud nga nagdili sa pagpananom. Ug gani, kitang tanan gi-encourage. Bisan tuod og naa ni siya’y cease and desist order, ang nasulod sa CDO nagkanayon nga ang katong earthmoving ug construction nga makadaut sa atong kalikupan, maoy unod sa atong CDO. Ug kini ang atong gibuhat dili man ni destructive. Ang ato, mandato ni sa usa ka mayor, usa ka chief executive sa usa ka lungsod, nga kini siya atong tabangan ug kutob sa mahimo atong suportaran ang programa nga reforestation," saysay ni Galeos.
Si DENR 7 spokesperson Eddie Llamedo miklaro nga wala sila magbawal kundi naghatag lamang og unsay maayong buhaton base sa sitwasyon sa lugar.
"We advised mangrove planting because it will certainly protect the coastal communities from storm surges, coastal flooding and stronger waves due to extreme weather pattern brought about by climate change. It is a suggestion and it is a judgment call on their part to follow it. We did not see the logic of removing or cutting down fully grown trees in Jampang and then initiate planting there where previous planting conducted does not indicate a significant survival rate," si Llamedo mipasabot.
Kahinumduman nga miluwat og CDO si CENRO Argao chief Flordeliza Geyrozaga tungod matud pa gipamutol sa mayor ang sobra sa 300 ka mga kahoy tungod sa gihimong dalan padung sa bukirang barangay sa Jampang. Giapelar ni Galeos ngadto sa korte nga papason ang CDO apan wala kini pabori.
Ang mayor mibutyag nga gusto siya nga mahuman ang karsada nga ilang nasugdan nga nahunong tungod sa CDO. Nag-ung-ong usab ang iyang kaso sa Ombudsman nga gipasaka sa DENR 7 tungod niini. (BANAT NEWS)
- Latest
