CPDRC personnel negatibo sa drug test
CEBU, Philippines - Negatibo sa gipahigayon nga random drug test ang tanang mga kawani ug opisyal sa Cebu Provincial Detention and Rehabilitation Center kon CPDRC niadtong nakalabay nga adlaw.
Ang Cebu Provincial Anti-Drug Abuse Council (CPADAC) miingon nga mao kini ang labing unang buhatan sa Kapitolyo nga wala’y namatud-an nga positibo sa paggamit og ginadiling drugas atol sa ilang gipahigayon nga surprise drug test.
Ang jail warden nga si George Manansala nga naapil usab sa naasoy nga drug test nitug-an sa usa ka interbyu sa usa ka sibyaanan nga silang tanang 34 ka mga kawani sa CPDRC pulos negatibo sa paggamit og ginadiling drugas.
Si Manansala sa iyang bahin miingon nga dako kaayo og ikatabang ang gipahigayon nga surprise drug test sa CPADAC sa CPDRC kay ilang matan-aw kung duna bay adis-adis sa ilang mga sakop.
Dugang pa niini nga ang maong kalambuan nagpalig-on sa ilang palisiya nga wala’y magpalusot nga illegal drugs sa sulod sa naasoy nga bilanggoan. (BANAT NEWS)
- Latest
