Tigbakay gustong i-regulate sa Talisay

CEBU, Philippines - Ang chairman sa committee on Games and Amusements sa konseho sa dakbayan sa Talisay buot nga ma-regulate ang tigbakay sa siyudad.

Mabantayan nga bisan og gidili ang pagpahigayon og tigbakay atol sa pista sa kabarangayan sa Talisay apan duna gyu’y magtago-tago pagpahigayon niini.

Si Konsehal Danny Caballero nagkanayon nga gisusi niya ang balaod nga napasar kaniadto sa konseho sa Talisay ug nasuta nga wala itugot ang pagpahigayon og tigbakay atol sa pista sa kabarangayan.

Gibutyag sa konsehal nga sa balaod karon sa siyudad gitugot lang ang sabong sa manok diha sa lisensiyadong cockpit arena matag Domingo lang ug legal holidays subay sa ordinansa.

Matud ni Caballero nga buot niyang maamendar ang ordinansa sa siyudad aron ma-regulate ug mahatagan na og permit kadtong mga barangay nga magpahigayon og tigbakay atol sa pista diha sa ilang lugar. Sa giduso nga resolusyon ni Caballero sa pag-amendar sa ordinansa sa siyudad ang paghatag og permit dili kini molapas sa tulo ka adlaw alang sa nagkalain-laing okasyon sa pista sa kabarangayan.

Ang maong permit pwede kining magamit nga sunod-sunod o sa buwag nga adlaw apan dili molapas sa tulo ka semana ang paggamit sa permit.

Gipasabot ni Caballero nga gawas nga ma-legal na ang mga tigbakay atol sa pista makakwarta pa niini ang siyudad tungod kay magbayad man og permit ang magpasiugda niini.

Ang tigbakay nahimo na kining tradisyonal nga kalingawan sa mga Filipino ug kasagaran kung adunay pista mao kini usa sa kalingawan nga ipahigayon.  Ang Presidential Decree 449 kon Cockfighting Law of 1974 nga gilagdaan ni kanhi presidente Ferdinand Marcos naghimong legal sa sabong.

Gawas nga kalingawan ang sabong sa manok nahimo na usab kining panginabuhian sa ubang mga tawo.  (BANAT NEWS)