Tulisan napusilan sa polis
CEBU, Philippines - Polis nga napusilan atol sa drug bust diha sa dakbayan sa Lapu-Lapu kapin usa ka buwan na ang milabay, nakapusil sa usa sa lima ka tulisan nga nanulis ug namusil sa ilaha untang biktimahon diha sa Sitio Matumbo, Barangay Pusok dakbayan sa Lapu-Lapu sa milabay’ng hapon.
Ang nakapusil mao si PO3 Joseph Villamor, sakop sa City Anti-Illegal Drugs Special Operations Task Force sa maong dakbayan.
Samtang ang napusilan mao si Marvin Villanueva Cañete, ug kauban niining si Gerald Zozobrado, kinsa nakaikyas, padayon pa usab giila ang tulo pa nila ka kaubang daling nakaeskapo.
Sa imbestigasyon ni Senior Inspector Junnel Caadlawon, ang hepe sa Station 5 , usa ka Marvin Montellano, 29, taga Sitio Gabi, Gun-ob, dakbayan sa Lapu-Lapu ang gisuwayan og tulis sa mga suspek apan nakamatikod kini ug mikaratel og dagan.
Apan ang mga suspek gikatahong migukod ug mipusil kang Montellano apan swerteng wa maigo. Si PO3 Villamor nga nahiagi sa lugar daling miresponde apan siya na man hinuoy gipusil ni Zozobrado apan wala sab makaigo ug sa pagbawos sa polis naigo si Cañete.
Misuway pa og tago si Canete sa panimalay ni Francis Aytona apan nadakpan kini ni Villamor ug nakuhaan og usa ka kalibre .357 uban sa lima ka buhing bala ug usa ka basiyo sa bala diha sa tambor niini, apan si Zozobrado ug mga kauban nakaikyas.
Kahinumduman nga bag-o lang naayo ang samad pinusilan ni PO3 Villamor human siya mapusili didto sa Barangay Looc atol sa ilang buy-bust operations sa milabay’ng bulan diin duha ka kinabuhi ang nakalas ug usa ang naangol. (/EIM)(BANAT NEWS)
- Latest
