P20M scholarship voucher gitunol sa TESDA sa Neg.Or.
CEBU, Philippines - Ang Technical Education and Skills Development Authority (TESDA) sa Negros Oriental pinaagi sa Director General niini ug Secretary Joel Villanueva pormal nga nitunol sa P20M nga balor sa scholarship vouchers ngadto sa 17 ka mga eskwelahan sa naasoy nga lalawigan alang sa 2,123 ka mga bag-ong tinun-an nga makabenepsiyo sa Training for Work Scholarship (TWSP) Program niini.
Sa iyang pagbisita sa Dumaguete City sa nakalabay nga adlaw, si Villanueva miingon nga ang naasoy nga scholarship programs nagsuporta sa mga tinun-an nga makakuha og mga technical vocation (TechVoc) sama sa automotive manufacturing, metals and engineering, construction, airconditioning and refrigeration, electronics, agriculture and fishery, processed food and beverage, health services, ICT, tourism, ug uban pa.
Matud pa ni Villanueva nga ilang gipersonal ang pag-promote sa mga advocacy sa TESDA pagsuporta sa trabahanteng Filipino pinaagi sa "skills development and their employability" sa nagkadaiyang trabaho sa mga industriya dinhi sa nasud ug sa gawas sa nasud.
Matud pa sa kalihim nga gitinguha karon sa ilang buhatan nga daghang mga estudyante ang makahibawo sa "tech-voc opportunities" ilabina niadtong dili maka-afford sa pagkuha og degree course sa kolehiyo.
Gipahibawo usab niini nga ang TESDA naghatag usab og certificates of commitments ngadto sa siyam ka mga benepisyaryo sa Kapisanan ng mga Brodkaster ng Pilipinas (KBP)-Negros Oriental chapter ubos sa TWSP TESDA nga mas naila nga public and private Technical Vocational Education and Training (TVET) institutions. (BANAT NEWS)
- Latest
