Cebu City di andam sa baha — PAGASA

CEBU, Philippines - Ang Philippine Atmospheric and Geophysical Services Administration (PAG-ASA) mipasidaan nga di pa gyud andam ang siyudad sa Sugbo sa problema sa baha nga dala sa pagbunok sa uwan.

Kagahapon, subling miawas ang mga kanal sa downtown Cebu City ilabi na ang V. Gullas ug D. Jakosalem ingon man sa ubang bahin sa siyudad tungod sa kapin tunga sa oras nga pagbunok sa uwan.

Si Mayor Michael Rama miingon nga padayong gipangitaan og solusyon sa kagamhanan ang problema sa pagbaha sa siyudad ilabi na nga ting-uwan na karon.

Matud ni Rama, kuwang gihapon og mga kanal ang siyudad nga kagawsan sa mga tubig.

Hinuon, hangyo niya sa mga katawhan manglimpyo sa ilang kaugalingon tugkaran aron kun magbaha dili moawas ang tubig.

Angay sab nga mosunod ang mga katawhan sa balaod sa pagbuwag sa mga dili malata ug malata nga basura nga giingong makatabang sa pagpakunhod sa rason sa pagbaha.

Kahinumduman nga subling mipasidaan ang Mines and  Geosciences Bureau (MGB) 7 nga adunay lima ka barangay sa dakbayan ang nameligro sa baha ug landslide nga mao ang Kinasang-an, Kasambagan, Labangon, Bonbon, ug Mabolo.

Matud ni Rama nga kinahanglan kini og lawom nga pagtuon aron pagsulbad sa daling panahon sa problema sa baha sa Sugbo. Nangandam sab ang Sugbo sa taho sa PAG-ASA nga ting-uwan ang buwan sa Hulyo.

Mi-apila ‘sab ang PAG-ASA nga angay gamiton ang panahon sa ting-uwan alang sa pagpangandam sa El Niño nga masinati sa nasud sa dili pa matapos ang tuig. (BANAT NEWS)