Mga balay boluntaryong gipaguba

CEBU, Philippines - Boluntaryong gipaguba sa mga tag-iya mismo ang tagsatagsa nila ka panimalay nga apektado sa paghawan daplin sa sapa sa Mahayag, Subangdaku, dakbayan sa Mandaue.

Si Tony Pete Juanico, pangulo sa Housing and Urban Development Office, miingon nga ang 200 ka panimalay nga maapektohan nalakip sa giandam nga 6.5 ektaryang relocation site sa barangay Paknaan.

Matud niya nga ang mga sakop sa demolition team wala na lang mohimo sa pagpangguba tungod kay ang mga tag-iya na lang maoy gihatagan og higayon aron magamit pa nila ang mga kahoy ngadto sa ilang balhinan.

Giangkon ni Juanico nga human sa sitio Mahayag, maoy ilang isunod ang sitio Mahusay sa nahisgutan gihapong barangay nga lakip sa ilang gihatagan og kahigayunan nga makabalhin og puyo sa relocation         site.

Gitataw ni Juanico nga adunay nalakip sa mga maapektohan nga mga molupyo nga dili na maka-apil sa pagbalhin sa giandam nilang relocation site sanglit dili na kwalipikado ubos sa lagda sa socialized housing sa kagamhanan.

Hinoon ang maong mga molupyo makadawat og financial assistance nga gibase ang kantidad sa minimum nga suhulan sulod sa 60 ka adlaw. (BANAT NEWS)