Suspek sa kawat sa kable nasikop
CEBU, Philippines - Nagtingkagol sa Talisay City detention cell ang usa ka suspetsadong kawatan og kable human kini masakpi sa kapolisan kagahapon sa kadlawon sa Cebu South Coastal Road (CSCR) habig sa Barangay Lawaan I, dakbayan sa Talisay.
Ang suspetsado mao si Bobby Villarosa, 34-anyos, taga Sitio Santo Niño, Cogon, Pardo, dakbayan sa Sugbo.
Si PO3 Ferdinand Pablo sa Talisay City Police Station mibutyag nga uban niya sila si PO3 Benedicto Lasque ug PO2 Edwin Campomanes nga nagpahigayon og patrolya dihang naabtan ang suspetsadong nagbunlot sa wire gikan sa poste sa island sa karsada hinungdan nga dali nila kining gisignit.
Na-recover gikan sa posesyon sa suspetsado ang “Globe Cable Copper Wire 300 pairs†nga dunay gitas-on nga 50 metros ug nagkantidad og P42,867 ug 150 metros nga stranded wire color blue ug itom nga dunay marking THW 600V 75C Philflex ug usa ka gabas. Matud ni Pablo nga ang suspetsado mitug-an nga ikatulo na niyang higayun nga nanguha og mga wires diha sa mga poste sa siyudad.
Gibutyag usab ni Pablo nga ang suspetsado napriso na kaniadto sa Talisay City Jail sa kasong pagpangawat.
Ang siyudad naproblema sa mga insidente sa kawat sa wire sa suga sa mga poste diha sa CSCR hinungdan ang maong lugar nagngiob tungod kay dili na man mosiga ang mga suga sa poste.
Gawas niini ang mga suga usab diha sa poste ug ang traffic lights batoon sa mga badlongon. (BANAT NEWS)
- Latest
