Nagpa-rehab nga brgy. workers wa molahutay

CEBU, Philippines - Wa molahutay sa out-patient drug rehabilitation ang 24 ka mga kawani sa mga barangay nga nagpositibo sa paggamit og ilegal nga drugas atol sa gihimong random drug tests sa Cebu City Office for  Substance Abuse  Prevention (COSAP) sa mga barangay sa siyudad sa Sugbo.

Matud pa nga sa 24 ka barangay workers nga nipaubos sa maong drug rehabilitation pito na lang ka buok ang nagpadayon samtang sa siyam nga kawani sa city hall nga nagpositibo, duha ang mipadayag nga gustong magpa-rehabilitate, apan ang usa dili na madawat sa out-patient rehabilitation tungod kay stage 3 na ang iyang pagka-adik o ‘habitual’ na ang iyang problema.

Ang COSAP nitanyag og libreng out-patient rehabilitation sa tanang nagpositibo ug ang budget gikuha gikan sa lain-laing non-governmental organization (NGO) nga mitabang sa maong buluhaton.

Ang 24 ka buok gikan sa Barangay Guadalupe, Labangon, San Roque, Pardo,  Sta. Cruz, SambagII ug Zapatera, apan nasuta nga sa kinatibuk-an 109 ka mga barangay employees ang nagpositibo sa paggamit og drugas, ang uban, wala mopaubos sa out-patient drug rehabilitation sa COSAP.

Si Alice Utlang, pangulo sa COSAP miingon nga dili sila makapugos sa maong mga empleyado pagpaubos sa maong programa tungod kay kinahanglan nga boluntaryo ang ilang pag-apil niini. Nigawas sa report nga kasagarang gamit sa mga nagpositibo ang shabu, marijuana ug mixed shabu ug marijuana.

Matud pa ni Utlang nga matawag niyang malampuson ang gihimong rehabilitasyon kun human sa usa ngadto sa duha ka bulan mag-negatibo sila sa surprise drug test. Usa sa gituohang rason ni Utlang kun nganong wala sila molahutay tungod ba kaha kini kay wala na silay ika-plete ug kinahanglan pa nilang manginabuhi para sa ilang pamilya.

Si Utlang dili uyon nga taktakon dayon ang mga kawaning magpositibo kay buot niya sila nga matabangan aron mahaw-as gikan sa pagkagumon sa drugas. (BANAT NEWS)