51 ka pulis nakahuman sa motorcycle riding course

CEBU, Philippines -  Nakahuman na sa 45 ka adlaw nga Motorcyle Riding Course ang 51 ka polis sa rehiyon nga gipasiugdahan sa Highway Patrol Group-7 isip pagpangandam sa Asia-Pacific Economic Cooperation (APEC) Summit sa Sugbo sunod tuig.

Gilangkuban ang grupo sa mga polis gikan sa nagkalain-laing bahin sa rehiyon gawas sa dakbayan sa Sugbo.

Matud ni Chief Insp. Oliver Plania nga nahinabi sa Banat News nga ang maong programa tipik ug kabahin sa pagpangandam sa dakbayan sa Sugbo sa umaabot mga dagkung kalihukan nga himoon sa Sugbo lakip na ang APEC Summit.

Dungan nga mitapos sa kurso ang mga sakop sa Motorcycle Riding Unit (MRU) sa Cebu City Police Office (CCPO). Samtang andam usab ang HPG-7 nga motabang sa Land Transportation Office sa pagpatuman sa lagda sa trapiko.

Sumala pa ni Plania nga ang ilang kahibawo sa dali nga pag-ila kung tinuod ba o dili ang plate number sa usa ka sakyanan ang magamit sa operasyon sa LTO.

Apan gipasabot niini nga molihok lang sila kung dunay opisyal nga hangyo ang maong buhatan ngadto kanila.  - /GMR (BANAT NEWS)