P2M nga school furniture sa Talisay wala igkita
CEBU, Philippines - Kini base sa 2013 audit report sa Commission on Audit kinsa nagduda nga adunay pipila ka lokal nga opisyal ang kunsabo sa Rattan Furniture Making (RFM), supplier sa giingong school furniture.
Gisusi sa COA ang mga tunghaan sa Mohon, Tapul, Candulawan, Talisay City Central School, Lawaan III, Looc, Biasong ug San Isidro nga maoy gihatagan sa mga furniture sama sa armchairs, blackboards, lamesa ug mga lingkuranan apan nasayran nga wala madawat ang maong mga butang sa tagsatagsa ka mga school heads ug principal.
Ang COA nagtoo nga gi-peke ang mga pirma sa maestra diha sa Inventory Custodian Slip (ICS) ug sa Acceptance and Inspection Report (AIR).
Ang COA nagkanayon nga kwestiyonable ang paghatag sa siyudad og P2,195,000 nga kinatibuk-ang bayad tungod kay ang mga butang mikantidad lang og P1,050,600. Ang COA miingon nga nakalapas usab ang siyudad sa balaud nga nagdili sa pasiunang bayad sa wala pa na-deliver nga butang.
Ang tinugyanan sa General Services Office nanghunaw sa wala ma-deliver nga mga butang sanglit dili sila ang nag-andam sa canvass documents.
Nunot niini ang COA nirekomendar sa kagamhanan sa siyudad nga mohimo og imbestigasyon aron masilutan ang mga opisyal nga nalambigit sa kalapasan.
Ang Bids and Awards Committee pa-esplikahon usab kun nganong shopping mode of procurement ang gigamit sa pagpamalit sa mga butang ug wala gipaubos sa public bidding. (/GMR)(BANAT NEWS)
- Latest
