Lima ka polis , apil opisyal ang naapil sa “blue book” ni Rosales

CEBU, Philippines - Human sa inisyal nga pagsubay sa Regional Intelligence Division (RID) sa mga “code” diha sa giingong blue book ug mga dokumento nga nakuha gikan sa grupo ni Owen Rosales, lima ka pangalan sa pulis ang gidudahang apil sa maong grupo ug usa kanila  dunay ranggo nga superintendent.

Mao kini ang gibutyag ni Superintendent Pablo Labra II ang hepe sa RID kagahapon atubangan sa mga tigbalita.

Sumala pa nga ang maong mga pangalan migawas human sa ilang gihimo nga evaluation, apan gipasabot ni Labra nga ilaha pa kining klaruhon ug sutaon kung sila lang ba nga mga pulis ang apil sa maong drug syndicate. Wala ‘sab gibutyag sa opisyal kung asa nga lugar nadestino ang maong mga pulis.

Gawas sa mga dagkong opisyal, gidudahan usab karon nga duna say mga politiko nga nagpaluyo sa maong grupo. Usa ka tinubdan sa Banat News sa Bohol mibutyag nga dunay lima ka mga opisyal nga dunay susamang ranggo sa maong probinsya. Ang source kinsa usa usab ka polis miingon nga mas maayong ma-expose kun kinsa kining mga polis nga atoa pusta sa pikas aron di maamong ang mga nagtinarong sa serbisyo. (/EIM)(BANAT NEWS)