JVR, anak ug duha ka opisyal gikiha’g graft
CEBU, Philippines - Talisay City Mayor Johnny delos Reyes ug tulo ka empleyado sa siyudad nag-atubang og kaso sa buhatan sa Ombudsman-Visayas tungod sa giingong pagkuha nila og 91 ka mga security guards sa Black Pearl Security Agency (BSA) nga wala mag-agi og bidding.
Usa ka Vicente Cabrera, Jr., residente sa San Isidro Street Tabunok, Talisay City, mao ang mipasaka og kaso batok sa mayor ug mga sakop tungod sa paglapas sa Republic Act (RA) 6713 o Code of Conduct and Ethical Standards for Public Officials and Employees, RA 3019 o Anti-graft and Corrupt Practices Act ug RA 9184 kon Government Procurement Reform Act.
Gawas ni delos Reyes, ang ubang gikiha mao sila si Bids and Awards Committee (BAC) chairman /city administrator John Yre de los Reyes, city treasurer Emma Macuto ug budget officer Edgar Mabunay. Giapil usab og kiha si Baltaire Balangauan ang presidente sa BSA.
Si Atty. Rene Abcede, Jr., legal counsel ni Cabrera mipasangil nga ang mga gikiha nagsabotsabot lang pagkuha sa serbisyo sa maong 91 ka security guards sa BSA isip mga job order employees inay nga i-hire ang serbisyo sa security agency mao nga nabentahaan hinuon sa maong kompanya ang siyudad.
Matud usab ni Abcede nga ang security guards sa BSA isip job order employees sa Talisay City magdawatan og P430 ang adlaw gikan sa Agosto 1 ngadto na sa Disyembre 31, 2013.
Sumala pa sa reklamo ni Cabrera nga sayop kini kay dili patas ang suholan sanglit kadtong mga job order employees nga nadestino sa nagkalain-laing opisina sa city government nagsweldo lang og P300 kada adlaw.
Si Cabrera nagkanayon sa iyang affidavit-complaint nga base sa report sa Commission on Audit (COA) , ang siyudad nibayad sa BSA og P5,972,510. Matud niya kun directly hired pa lang ang serbisyo sa mga security guards isip job order employees makaminos sila’g P1,822,910.
Dugang pa sa complaint nga wala say pagtugot sa konseho ang pagkuha sa serbisyo sa maong mga gwardiya ug wala usab silay permit to operate isip security agency diha sa Talisay nianang panahon nga gikuha ang maong mga gwardiya, nahatagan lang sila og permit niana nang Nobiyembre 25, 2013. (BANAT NEWS)
- Latest
