Mubo’g lupad nangawat sa iyang kustomer

CEBU, Philippines - Igo na lang sa pagtaho sa Toledo City Police Station ang usa ka lalaki nga giingong gikawatan sa iyang gamit ug kwarta dihang kuyog niya ang usa ka babaye nga gituohang mubo og lupad sa sityo Lawis, Luray Dos, dakbayan sa Toledo.

Giila ang biktima nga si Dennis Cabate hingkod, usa ka assistant cook sa usa ka pribadong kompaniya ug lumad nga taga Ilocos Sur apan kasamtangang nagpuyo sa sityo Drilling, Luray Dos.

Sa imbestigasyon nilang SPO3 Jose Dante Talandron ug PO1 Junrel Pili nasayran nga ang biktima niabang og lawak kauban ang usa ka wala hiilhing babaye nga gituohang nagbaligya og lawasnong kalipay.

Ang biktima giingong maayong pagkahinanok sa iyang pagkatulog kauban sa maong babaye sa lawak.

Apan sa iyang pagmata, napalgan na lang nga nawagtang na ang iyang cellphone nga Lenovo nga nagkantidad og kapin sa P8 mil ug cash nga kwarta nga mobalor og dili momenos sa P4 mil.

Dungan sa pagkahanaw sa iyang gamit ug kwarta wala na usab ang babaye nga iyang gikauban sa pagkatulog. (BANAT NEWS)