Mga basiyo sa bala sa ambush ug shootout sa Bohol nagtakdo
CEBU, Philippines - Grupo sa napatay nga gipasanginlang drug lord sa Bien Unido, Bohol mao gyuy suspek sa pag-ambush patay sa hepe sa kapolisan sa Ubay, Bohol , kini base sa resulta sa ballistics tests sa mga bala nga nakuha sa ambush area ug sa mga armas nga na-rekober gikan kanila.
Tungod niini, pasakaan na og dugang kasong murder ang upat ka tawong misurender nga kauban sa unom nga napatay lakip ang kanhi polis nga si Owen Rosales atol sa engkwentro sa Playa Beach Resort sa Bien Unido Bohol.
Ang upat giila nga sila si Roberto Olalo, Orlando Garcia, Paulo Avenido ug ang usa ka 17-anyos nga babaye.
Matud pa nga nagtakdo ang mga basiyo sa bala nga nakuha sa lugar kung asa gi-ambush si Chief Insp. George Caña sa Talibon ug sa mga nahipos nga mga basiyo sa bala sa maong resort.
Kini ang gipamahayag ni Chief Supt. Prudencio Bañas ang hepe sa Regional Police Office (PRO) 7 nga nahinabi sa mga tigbalita human mogawas ang resulta sa gihimong ballistic examination sa PNP Crime Laboratory. Gawas sa upat, gitun-an usab kung iapil sa kaso ang laing tulo ka mga giingong kauban sa grupo ni Rosales nga nadakpan sa checkpoint sa San Miguel, Bohol human sila nagpositibo sa paraffin test matud pa sa usa ka kasaligang tinubdan gikan sa Camp Francisco Dagohoy sa Bohol Provincial Police Office nga nakahinabi sa Banat News
Ang tulo giila nga sila si Cerilo Cagatin, Romelos Languido ug Michael Lagunsad, nga nakuhaan og mga magazine sa M16 rifle, magazine .9mm ug granada nga gidudahang padung mo-reinforce sa grupo ni Rosales sa Bien Unido apan nauwahi na sila sa pag-abot ug mibalik sa agi mao nga nadakpan sa checkpoint sa San Miguel.
Samtang padayon karon ang gihimong pagsusi sa nakuhang “blue book†nga giingong adunay mga “codes†diha sa cottages sa mga napatay nga suspek, gisusi kun ang maong mga codes mga aktibong polis ug politiko nga posibleng protektor sa maong sindikato. (BANAT NEWS)
- Latest
