Pito padulong magsuyop sikop
CEBU, Philippines - Pito ka lalaki kinsa giingong paingon untang maghingos og shabu ang nadakpan sa gipahigayong aggressive patrolling sa kapolisan niadtong Martes sa gabii sa Sitio Magay, Barangay Tanke, dakbayan sa Talisay.
Ang mga nasikop mao sila si Isidro Barro, 33 ug Danilo Piedad, 45 kinsa parehong taga Barangay San Isidro sa maong dakbayan; Preciano Baraclan, 58, ug John Michael Seldon, 35, kinsa parehong taga Barangay Tulay, lungsod sa Minglanilla; Ryan dela Victoria, 27; Richard Cabasa, 36 ug Ronillo Abatayo, 40, parehong taga sitio Bravo, Kimba, Barangay Cansojong, dakbayan sa Talisay.
Na-recover sa mga polis gikan sa posesyon sa mga suspetsado ang mga drug paraphernalia sama sa tissue wicks, strips aluminum foil ug lighter.
Sa report sa kapolisan ang nahisgutang mga suspetsado giingong nagtapok sa usa ka payag-payag ug naghuwat sa ilang gi-order nga shabu apan demalas kay naabtan sila sa mga polis ug nasikop hinungdang wala madayon ang ilang pagsuyop og shabu.
Ang pito ka suspetsado mag-atubang og kasong paghupot og drug paraphernalia. (BANAT NEWS)
- Latest
