Gasolinahan gilungkab

CEBU, Philippines - Usa ka gasolinahan diha sa eskina sa D. Jakosalem ug Legaspi St. sa Barangay Sto. Niño gilungkab, dul-an P300 mil cash ug gadgets nakuha sa mga kawatan kagahapon sa kaadlawon, kapolisan nagduda nga “inside job” ang nahitabo. Base sa imbestigasyon ni SPO1 Reynold Malazarte sa Waterfront Police Station  nga gituhoang sayo sa kaadlawon gihimo ang pagpangawat pinaagi sa pagbuak sa bildo nga bungbong sa maong establisamento. Nakuha sa mga kawatan ang cellpone kantidad P10 mil,  usa ka laptop kantidad P60 mil ug giapil pa og dala sa mga kawatan ang vault nga dunay sulod nga salaping cash kantidad P195 mil.

Si Chief Insp. Wayne Magbanua, hepe sa Waterfront Police Station nga nahinabi sa Banat News mitug-an nga wala nag-function ang CCTV camera ug wala ‘say guwardiya nga nagbantay. Matud pa ni Magbanua nga dugay na sab diay nga gitambagan sa kapitan sa barangay Sto. Niño ang tag-iya sa gasolinahan nga si William Yu nga magbutang og guwardiya sa gawas.

Sa gihimong imbestigasyon, nasayran nga dunay mga lalaking nakit-ang misakay og taksi nga nagdala og vault gikan sa maong gasolinahan, tungod niini nagduda si Magbanua nga organisado ug posibleng inside job ang nahitabo. Nangayo na ‘sab og dugang impormasyon ang Waterfront Police ug dugang impormasyon gikan sa ubang police units sa pamasin nga makatabang sa ilang imbestigasyon.  - /EIM (BANAT NEWS)