FISECA imbestigaron ni JVR

CEBU, Philippines - Ipa-imbestigar ni Talisay City Mayor Johnny De los Reyes ang report nga dunay sakop sa Fisherman Sea and Ecological Care (FISECA) ang giingong milukat sa mananagat nga nasakpang ilegal nga nanagat sa kadagatan sa Bohol. Si De los Reyes nasagmuyo sa maong report ilabina sa giingong padayong kasamok o wala pagsinabtanay sa mga sakop sa FISECA.

Subay niini, si Konsehal Antonio Bacaltos Jr., chairman sa committee on environment sa konseho sa siyudad, nagkanayon nga posibleng ang giingong nadakpan sa Bohol dunay paryente nga sakop sa FISECA hinungdan nga maoy miadto aron pagbayad sa multa. Matud ni Bacaltos nga mosusi usab siya sa maong report samtang ang mayor maoy dunay katungod sa pagsulbad sa giingong kasamok sa FISECA  tungod kay ubos sa iyang buhatan ang pagdumala niini. Gipasabot ni Bacaltos nga sila sa konseho igo lang silang mohimo og sugyot alang sa mga kinahanglanon sa FISECA. Nasayran ni Bacaltos nga ang ubang sakop ni Arturo Aras ang gibalik na usab diha sa FISECA ug posibleng maoy hinungdan nga nag-faction na usab ang FISECA.

Si Aras maoy gitudlo sa mayor isip hepe sa FISECA puli kang Gregorio de la Torre. Apan ang grupo sa mga mananagat mireklamo batok kang Aras hinungdang gitangtang kini sa iyang posisyon ug gibalik si de la Torre.

Dugang ni Bacaltos nga dunay mga tawo ang giingong midaut sa imahen sa FISECA kinsa giingong mangayo og isda sa ubang mga mananagat ug gamiton niini ang ngalan sa FISECA.

Ang konsehal midugang nga makig-estorya siya sa mayor kabahin sa maong problema.  - /GMR (BANAT NEWS)